Assalaamu Caleyku Waraxmatullaahi Wabaraakaatuhu

Walaalayaal waa qeyb kale oo aan uga hadleyno faa'iidada ay sadaqadu leedahay

Sadaqadu waxay horyaal iyo albaab laga soo galo u tahay acmaasha kale oo dhan, bixinta sadaqada iyo wax nafaqaynta meel ilaahay jecelyahay lagu bixiyo waxay fure u tahay khayr oo dhan, waxayna kuugu baaqaysaa khayrka noocyadiisa oo dhan, maxaa yeelay saynu horay usoo sheegnay naftu xoolo jacaylka waa lagu abuuray, haddaba qofkii waxa uu jecelyahay bixiya ilaahay waxa uu ugu badalayaa waxyaalo qaali ah oo ilaahay jecelyahay, waana camalka saalixa ah oo qofka samayntiisa loo fudaydiyo, sidoo kale waxaa loo sahlaa ka tagidda camalka xun, qof nasiib wanaagsan oo ilaahay khayr la doonay ayaa labadaas arimood isla hela, hadalka dambe waxaa yiri shiikh C/raxmaan binu sacdii, isagoo sharaxaya aayado ka mida suuratul al-layl lambarkooduna yahay 5-6-7, ugu dambayntii aayadaan soo socota ee suuratul aali-cimraan lambarkeeduna yahay 92 wuxuuna ku yiri : ( wanaag iyo khayr badan helimaysaan kamana mid noqon karaysaan dadka loo yaqaano baariyaasha Illaahay, illaa aad ka bixisaan xoolihiina nooca aad ugu jeceshihiin), haddaba bal aan wax yar fiirino aayaddaan noogu dambaysay saxaabadii Rasuulka c.s.w. raadka iyo saamaynta ay ku reebtay iyo jawaabta ay ka bixiyeen markay soo dagtay aayaddaan:

A- Abuu dalxa wuxuu ka mid ahaa ragga ugu xoolo badan saxaabadii ansaarta loo yaqaanay ee madiina dagi jiray, xoolihiisana wuxuu ugu jeclaa beer la oran jiray (bayruxa), markey aayaddaani soo dagtay intuu rasuulka aaday ayuu wuxuu ku yiri: xoolahayga waxaan ujeclahay (bayruxa) ilaahay dartii baan u sadaqaystay, Rasuulkuna c.s.w. wuxuu ugu jawaabay (wax weyn baad heshay).
 
B- Saxaabi kale oo la oran jiray Sayid binu xaarisata, wuxuu lahaa hal faras oo kaliya, markay aayaddaan hore usoo xusnay soo dagtay ayuu wuxuu yiri: (Ilaahayow waad ogtahay inaanan lahayn xoolo hal faras ka badan), kadibna Rasuulka c.s.w. buu aaday wuxuuna ku yiri (faraskii aan kaligiis lahaa ilaahay dartii baan u baxsaday ee ogow), Rasuulkuna c.s.w wuxuu ugu jawaabay: (Ilaahay waa kaa aqbalay).

C- Cumar binu khadaab R.C ayaa abii muusaa al-ashcari wuxuu ka codasay inuu usoo iibiyo jaariyad (addoon), markuu usoo iibiyay una keenay ayuu Cumar R.C. aad ula yaabay jaariyadda wanaageeda, kadib markuu akhriyay aayaddaan aynu ka hadlayno ayuu jaariyaddii ku yiri (xor baad tahaye iska tag).

D- C/llaahi binu Cumar binu khadaab R.C  wuxuu yiri: (aayaddaan baan akhriyay kadibna xusuustayda ayaan kusoo xaadiriyay xoolahayga waxa ugu fiican, waxaa iila fiicnaatay jaariyaddayda (radiyah), waxaanan ku iri ilaahay wajigiisaan kugu xoreeyay, mar kalana asagoo hal geela gaadiid ahaan u saaran ayuu layaabay hasha wanaageeda, intuu fariisiyay buu sadaqaystay.

E- Rabiic binu khuthaym R.C markuu u yimaado qof baryootamaya (tuugsanaya), xaaskiisa wuxuu ku dhihi jiray: sonkor sii maxaa yeelay anigu waxaan jeclahay sonkorta , ilaahayna wuxuu yiri waxaad jeceshihiin baxsada ama sadaqaysta.

Cumar binu c/casiis oo ahaa khaliifkii 5aad ayaa asna aad sokorta ubixin jiray, waayo wuu jeclaa, marka lagu yiri qiimaha sokorta maad baxsatid? wuxuu ku jawaabi jiray: (anigu sokortaan jeclahay, ilaahayna wuxuu yiri waxaad jeceshihiin baxsada), haddaba ogow sokorta uu baxsan jiray waxay ahay kiintaalo ama jawaano, sidoo kale isagoo aayaddaan ka shidaal qaadanaya ayuu xoreeyay adoon uu adeegeeda aad u jeclaa.

Go to homepage
Copyright © 2007-2011 All Rights Reserved to agoonta, Disegned by Xasan C. Xuuriye